Gu eta besteak, besteak eta gu

 

Kaixo, maitia eta

koma hasieran,

agur, maitia eta

puntu bukaeran.

Garrantzitsua baita

nola hasten geran,

ta garrantzitsua da

nola bukatzen dan.

 

 

Sexualitatea doa

komatik puntura,

jaiotze momentutik

heriotz ordura.

Ez da inoiz lokartzen

azalaren gura,

zergatik aplikatzen

diogu zentsura?

 

 

Emozio konplexu

batzun ondorio,

inpultsuak eteten

dittugu propio,

guztiak baimentzeak

ez baitu balio,

onartu beharko da,

ze erremedio!!

 

 

Dena den nahi duguna

askatasuna da,

espontaneo izan,

debekuak laga,

baina nahi dugun hori

bete ezin bada,

frustrazioan erraz

asko jausten gara.

 

 

Toleratu eziñak

sarri garamatza

besteengan jartzera

norbere lokatza,

hala doa maitasun

ta_harremanen martxa,

gurea da ardura,

gurea akatsa.

 

 

 

 

Akatsetatik asko

ikas daiteke_eta,

harremanetan segi,

nahiz kosta tarteka.

Gaitasunak guregan

daudenez gordeta,

batez ere haiengan

ipini arreta.

 

Unai Muñoz Iztueta

 

 

Argazkia: Gorka_”Mikrofonoa-Lisabö” hemendik hartua