Idoia Granizo | Doinua: Txuriko

 

 

1.

Inporta du nork bota

didan begirada?,

inporta du nork sortu

ohi didan zirrara?,

nahi dudana maite nahi

nuke ahal bada

naizena izatea

bekatua al da?

 

2.

Gizarteak presioa

duenez garatu,

horrela erantzuten

diet ta, barkatu,

ezin naute irtetera

inolaz behartu

oraindikan ez bainaiz

armairura sartu.

 

3.

Ilunegia denez

gaurkoan leizea,

sakonegia denez

jada oinazea,

aldarrikatu nahi dut

zer den bizitzea:

maitatu sentitzea

eta maitatzea

 

4.

Berdin du koloreak,

arrazak, adinak,

orientazio sexual,

genero ezberdinak,

denok gara zirkulu

bereko erpinak,

ezberdinak ta aldi

berean berdinak.

 

5.

Asteazken honetan

hasiz abentura

aniztasuna jada

Madrilen hustu da,

baina ezin dugunez

bertan jarri muga,

ortzadarra zabaldu

behar da mundura.

 

6.

Mundu aurrean jarri

naiz aurpegi lasaiz,

nahiz diskriminatuta

sentitu naizen maiz,

ta oraingo honetan

nabilenez garaiz,

naizena izan nahi dut

eta izango naiz.

 

 

Irudia: Olga Berrios hemendik hartua